مهنس موقع ( حساب كميات المواد المستخدمة في صب الخرسانة )

كمهندس مقاول مطلوب مني اعمل حصر كميات لمواد البناء من رمل و زلط و اسمنت و حديد او كمهندس مكتب فني ايا كان فانا مهندس

لكن المطلوب مني ان احدد الكميات المطلوبة لمرحلة صب الاعمدة و مرحلة صب الاسقف

بمعني اكون عارف ان وانا لسه بسمي الله و رايح الموقع المفروض يكون متوفر عندي "س" متر مكعب رمل و "ص" متر مكعب زلط و "ع" طن حديد و "ل" طن اسمنت

تمام جدا و لحد هنا انا معاك
طيب انا عاوز اوصلك ايه بقي ؟؟

انا عاوز اقولك ان فيه حاجة اسمها حساب معدلات الاستهلاك بمعني اني اشوف انا محتاج كميات قد ايه بحيث اوردها و بزيادة شوية للموقع عشان لو لا قدر الله فيه هادر كتير " و دة بيحصل كتير لاسباب معروفة او غير معروفة " الموقع ميعطلش و اجي في الاخر اعمل شوية حسابات بسيطة اقدر احدد بيها الهادر مقداره قد ايه و متبقي عندي في الموقع قد ايه من المون بحيث اقدر احدد الكميات اللي هطلبها مع الصبه الجاية ان شاء الله

كمثال عندي سقف حجمه 10 متر مكعب و بستخدم الخلطة 0.4 رمل و 0.8 زلط و 6 شكائر اسمنت للمتر مكعب

المفروض استخدم 4 متر مكعب رمل
و 8 متر مكب زلط
و 60 شيكارة اسمنت

و انا بورد للموقع وردت كالتالي
6 متر مكعب رمل
10 متر مكعب زلط
70 شيكارة اسمنت

المفترض ان مقدار الزيادة في الوارد بيكون هو قيمة المتبقي
لكن لعيوب في الشدة الخشبية او لوجود مشاكل اثناء الصب ممكن بستخدم اكتر من المطلوب توريده بكميات بحددها بعد انتهاء الصب و عمل حسابات معدلات الاستهلاك و اقارن المتوقع استهلاكه بالذي تم استهلاكه فعلا و هل ان حافظت علي المون باني وصلت للمعدلات اللي انا عاوزها "0.4 رمل و 0.8 زلط و 6 شكائر اسمنت للمتر مكعب" ولا لأ